Lampu-lampu Dalan nang Kota Tegal Dipaténi Sawulan Wayah PPKM Levél 3 Serentak

Dalan nang Kota Tegal peteng sebabe PJU dipateni wayah PPKM Lével 3 sadurunge. (dok panturapost.com)

TEGAL — Ora mung mepet dalan, Pemkot Tegal uga duwé rencana maténi lampu-lampu dalan utawa lampu penerangan jalan umum (PJU) wayah pan ana PPKM Levél 3 bebarengan nang masa préinan Natal lan Taun Baru (Nataru) 2022.

"Maténi lampu-lampu dalan pan dilakoni sekitar sawulan. Utawa molai tanggal 1 Désémber 2021 nganti 1 Januari 2022," jaré Kepala Dinas Pekerjaan Umum dan Perumahan Rakyat (DPUPR) Kota Tegal Sugiyanto maring wartawan, dina Senén (29/11/2021).

Sugiyanto nyebut, lampu PJU sing dipaténi yakuwé nang dalan protokol lan tempat umum sing ana rumbengan. Neng antarané nang wilayah kuwé, lampu PJU pan diurubna molai jam rolas bengi, nganti jam setengah pitu ésuk.

Sawisé PPKM levél 3 bebarengan lubar, PJU pan dinormalna maning yakuwé murubé molai jam setengah enem soré nganti jam setengah pitu ésuk.

"Pemadaman PJU nggo nyegah rumbengan neken nyebaré Corona bareng karo pan ditrapnané PPKM Levél 3 bebarengan nang masa préinan Natal lan Taun Baru," pungkasé.

Sadurungé dibritakna, Wali Kota Tegal, Dedy Yon Supriyono nyebut ana pirang dalan nang Kota Bahari pan dipepet nggo mbatesi pergerakané masarakat nang masa préinan Natal lan Taun Baru (Nataru) 2022.

Hal kuwé dilakoni nyusul kebijakan pemréntah pusat nerapna PPKM Lével 3 bebarengan neng tanggal 24 Désémber 2021 nganti tanggal 2 Januari 2022.

“Nang Kota Tegal molai persiapan mengko pertengahan wulan Désémber. Dalan-dalan sing nang endi pergerakané akéh dhéwék pepet. Mengko mepet dalan sesuai karo arahan pemréntah pusat,” jaré Dedy wayah acara Gelar Produk Industri Kecil Menengah (IKM) nang Gor Tegal Selatan, dina Saptu (27/11/2021). (*)