Jroh That, Lakoe Binoe Peulisi Peusapat Peng Gaji Geubantu Ureueng Gasien

Lakoe ngon binoe sidroe peulisi di Aceh Utara watee geujak jok bantuan bak rumoh ureung gasien nyang na lam Kecamatan Langkahan. Foto: Dok. Polres Aceh Utara

Brigadir Irvan, sidroe peulisi Bhabinkamtibmas bak Polsek Langkahan di miyup Polres Aceh Utara bak uroe Seulanyan baroe (4/5), ka geujak u rumoh-rumoh ureueng gasien ngon ureueng difabel atawa disabilitas nyang na lam Kecamatan Langkahan keu geubantu.

Bantuan nyang geujok nyan nakeuh sumbangan dari peng gaji ata geupeusapat dua ngon peurumoh gop nyan nyang nan geuh Mawarni. Peurumoh Brigadir Irvan nyan siuroe-uroe geukeurija seubagoe ibuk Bidan di Puskesmas Langkahan, Aceh Utara.

Peng nyang geupeusapat dari sibuleun gaji ureung nyan dua geuh banmandum troh tujoh juta. Peng nyan mandum lhueh nyan geupakek keu geubloe breuh, boh manoek, minyeuk maguen, saka, indomi, bubok te ngon kupi. Banmandum troh 40 boh paket teukumpoi hase geupeusapat sibuleun gaji ureung nyan bandua.

Lheuh nyan, ubena paket sembako nyang kalheuh geubloe nyan geujak jok keudroe le dua droe ureueng lakoe ngon binoe nyoe u rumoh-rumoh ureueng gasien. Brigadir Irvan watee geujak jok nyan geupakek bajee seuragam peulisi. Peurumoh gopnyan, Mawarni, geupakek bajee Bhayangkari mirah jambu.

Brigadir Irvan ngon peurumoh geuh, Mawarni, geujak jok langsong bantuan u rumoh-rumoh ureueng gasien ngon hamba laeh nyang geubantu. Foto: Dok. Polres Aceh Utara

"Lon meulakee bantuan nyoe beujeut manfaat keu ureung nyang teurimong lam geupeubuet ibadat puasa thon nyoe lam teungoh na peunyaket taeun Corona (COVID-19)," kheun Brigadir Irvan lam lapuran nyang kamoe teurimong.

Pak Kapolres Aceh Utara AKBP Tri Hadiyanto nyang geupeutroh le Pak Kapolsek Langkahan Iptu Samsul Bahri geupeugah bangga ngon geudukong that peu nyang ka geupeubuet le Brigadir Irvan ngon peurumoh geuh nyang ka geujak bantu ureueng gasien ngon hamba laeh.

Meunan chit Pak Camat Langkahan, Kausar, geuapresiasi that buet nyang ka geupeubuet le Brigadir Irvan dua ngon peurumoh geuh.

"Tameulakee peu nyang ka geupeubuet le Pak Irvan beujeut keu motivasi ureueng-ureueng lain lagee toke-toke beu geujak bantu hamba laeh nyang na lam Kecamatan Langkahan," kheun Pak Kausar.

Nyan ban hai. Kiban meunuroet ureueng droeneuh keu buet nyang kalheuh geupeubuet le lakoe binoe nyan, na jroh? Adak jeut beurame nyang beulagee nyan. []

Note: berita dalam bahasa daerah (Aceh) ini disampaikan sesuai kebijakan dari kumparan untuk para partner 1001 Media, bertujuan melestarikan bahasa daerah.