Kapai KRI Siwar-646 Joek Bantuan keu Awak Meulaot di Seulat Malaka

Pasukan TNI AL KRI Siwar-646 teungoh geujoek bantuan keu awak meulaot nyang na lam Seulat Malaka. Foto: Dok. KRI Siwar-646

Lam teungoh operasi dimiyup Gugus Tempur Laut Komando Armada I lam kawasan Seulat Malaka, kapai KRI Siwar-646 geucok watee keu geupeujalan saboh buet nyang jroh. Awak nyan geujak mita ureueng nyang teungoh meulaot bak pante baroh Aceh.

Hana kureung nibak 50 boh bungkoh sembako tamah lom masker ngon vitamin geujak joek le awak kapai KRI Siwar-646 nyoe keu ureueng tanyoe yang teungoh geumita ungkot lam laot di Lhokseumawe bak uroe Seulanyan supot (18/5/2020).

Pasukan TNI AL KRI Siwar-646 teungoh joek bantuan keu awak meulaot lam Seulat Malaka. Foto: Dok. KRI Siwar-646

Watee geujak joek bantuan nyan keu ureueng nyang teungoh mita ungkot lam laot, awak KRI Siwar-464 nyan geupakek RHIB atawa boet sekoci. Sidroe-droe awak nyang teungoh ungkot lam laot geupeutoe keu geujak joek 50 boh bungkoh bantuan nyan.

Komandan KRI Siwar-646, Mayor Laut (P) Anugerah Annurullah, geupeugah buet nyan seubagoe saboh wujud ureueng nyan peuduli ureueng meulaot lam teungoh na peunyaket taeun Corona atawa COVID-19.

Teungoh peutron bantuan dari lam kapai KRI Siwar-646 keu jak jok bak boet-boet awak teungoh meulaot lam Seulat Malaka. Foto: Dok. KRI Siwar-646

Lam haba meutuleh nyang troh bak kamoe acehkini baroe supot, geupeutrang buet nyang ka geupeulaku nyan kiban nyang ka geupeutroen lam peuneutoh Pang Ulee TNI AL.

Meunurot gopnyan, taeun COVID-19 nyoe ka cukop that luah meudampak keu ureueng gampong ngon awak meulaot lam sagoe bineh pante baroh Aceh nyang geumeuudep ngon hase geupubloe ubena ungkot nyang geupuwoe.

Pasukan TNI AL KRI Siwar-646 teungoh joek bantuan keu awak meulaot lam Seulat Malaka. Foto: Dok. KRI Siwar-646

"Kamoe meuharap buet nyang ka lheuh kamoe peubuet nyoe jeut keu peukureung beban udep awak meulaot, leubeh-leubeh lom nyoe ka toe ngon uroe raya puasa (Idul Fitri 1441 H)," meunan kheun Mayor Anugerah.[]

Note: berita dalam bahasa daerah (Aceh) ini disampaikan sesuai kebijakan dari kumparan untuk para partner 1001 Media, bertujuan melestarikan bahasa daerah.